٥.١١.٠٧

الأرز المعمر

الرز المعمر طبعا فيه ناس تعرفه وناس تسمع عنه بس وبتقول أنها أكله ريفية ميه فى المية واللى بيعرف يعملها بتوع الريف بس لكن أنا حبيت أعرفكم أن الأكلة دى ممكن أى حد يعملها وسهلة جدا وهوريكوا الطريقة بالصور من مطبخ بيتنا لهنا على طول
المقادير
رز على حسب أحتياجات كل واحدة
سمنه
لبن مغلى وياريت يكون بارد وكمان خارج من الثلاجة
ملح
قشطة لو موجود
الطريقة
نحضر صينية ونضع بها السمنه


نحضر الأرز ونغسلة جيدا ونضعه على السمنه






نضع الملح على الأرز ونقلبه جيدا

ثم نضع عليه اللبن



نستمر فى وضع اللبن حتى يغطى الرز


ونتركه قليلا حتى يتشرب اللبن ثم نضع عليه الباقى حتى يغطيه تماما ويكون أعلى من مستوى الرز بحوالى خمسه سنتم أو أكثر قليلا



ولو موجود قشطة نضع منها ملعقة أو اثنان على الوش

وبعد ذلك ندخله الفرن والأحسن أن ندخل الصينية الفرن من بداية تشغيل النار

بعد حوالى 20 دقيقة نفتح الفرن ونلف الصينية وكل مده نفعل هكذا حتى يحمر كل وجه الصينية




وعندما يصل الى الشكل السابق نطفى نار الفرن ونترك الصينية بداخلها حتى تصل الى هذا الشكل

ملحوظة كمية اللبن هيا المتحكمة فى طعم الرز وطبعا هيا بتتحط بالتقريب وممكن لو مرة طلعت الصينية ناشفة والرز ناشف المرة اللى بعدها نزود اللبن وهكذا لحد ما توصل للمطلوب ونعرف المقدار المطلوب

وبالهنا والشفا

هناك ٢٢ تعليقًا:

mesh2dra يقول...

السلام عليكم

بجد
بجد
تسلم ايدكم ووصفاتكم
انا بموت
لا لا مش بموت
انا بعشق حاجة اسمها ارز معمر

ربنا يخليكم للناس اللي مش بتعرف تطبخ :D

سلاماتي

همسات ساكنه يقول...

بجد انا بحب الرزالمعمر جدا
يلا حابقى اجربه بقى
لان انا بعرف اكله بس مش بعرف اعمله :$
طلع طريقته سهله وحجربها ان شاء الله
تسلم ايديكي يا بوس بوس
بس قوليلي
كلتوه كله ولا لسه فيه معلقه كده ولا كده ;)

لو بطلنا نحلم نموت يقول...

اناجعااااااااااااااااااااااااااان

مافيش لحمه معاها
ولا هيه رز بس
ان شاله لو طبيخ

بس تسلمي علي المجهود

Unknown يقول...

بوظتولى الرجيم الله يسامحكم

عااااااااااااا

بسمه عبدالباسط يقول...

مش قادرة

وعليكم السلام
الحمد لله انك بتحبيه
وبتمنى تكونى عرفتى تعمليه

تحياتى لكى

بسمه عبدالباسط يقول...

همسات ساكنة

فعلا هو طريقته سهلة جدا
تخيلى كلناه كله كله

بسمه عبدالباسط يقول...

حواديت وحكاوى

كان فيه طبعا معاه حاجات تانية بس الحاجات التانية تقليدية ومعروفة
بس دة اللى مش معروف

تحياتى لك

بسمه عبدالباسط يقول...

إنسانة

بوظنا الريجيم يعنى معنى كده انك عملتيها
كويس قوى

تحياتى لكى

RealMan يقول...

اما بنات اخر زمن صحيح يا بنتي انا اعرف ان الرز المعمر ده طول عمره بيتعمل في طاجن. خلاص خليتوها صواني ارحمونا بقي.

اين الطاجن من فضلكم انا عايز رز معمر بالحمام في طاجن

بسمه عبدالباسط يقول...

realman

يا أستاذ أكيد أحنا مش مختلفين أن الرز المعمر بيكون أفضل بكتير وهو معمول فى طاجن ومحدش يقدر ينكر ده
بس لو مش متوفر الطاجن حضرتك ممكن يتعمل فى صينية ومش هيقول لأ

وأحنا مش بنات أخر زمن
بنات أخر زمن حضرتك مابيعرفوش أصلا يعملوا كوباية شاى

على فكرة أنا ما بزعلش من النقد لكن فى حدود المعقول ومن غير أستخدام الفاظ تضايق اللى قدامك

ممكن تنقدنى من غير ما تغلط فيا

تحياتى لك ويسعدنى أستمرار النقاش

سهر الليالى يقول...

bos bos

عجبنى جدا فكرة المدونة دى وحلوة اوى بجد ولو معندكوش مانع أنا عاوزة أشارك معاكو

دورت على إيميل ليكى عشان نتواصل ومش لاقيت
دة الميل بتاعى
youkamoon@yahoo.com

ياريت اشوفك
وميرسى على مرورك الجميل فى المدونة عندى

تحياتى وفى انتظارك

أُكتب بالرصاص يقول...

فكرة المدونة هايلة


بس عندي ملاحظتين


الصور مش واضحة


ثانيا

المقادير
اهم حاجة
الملح والرز واللبن

انا مش كل مرة هاجرب لحد ما تظبط

ويعدين
يا ريت الاستمراية

Unknown يقول...

مش بحب الارز خالص
احنا في الصعيد مبنحطش عليه لبن
شوربة بس

بسمه عبدالباسط يقول...

barb michelen
شكرا على الزيارة

تحياتى لك

بسمه عبدالباسط يقول...

سهر الليالى

انا ضفت ميلك عندى على الياهو ياريت تقبلى الأضافة
وطبعا أحنا يشرفنا أنك تنضمى لينا
فى أنتظار مقابلتك على الميل
ولو كنتى دخلتى مدونتى الأصلية الروح
http://www.elroh.blogspot.com/
كنتى لاقيتى ميلى فيها

تحياتى لكى

بسمه عبدالباسط يقول...

أكتب بالرصاص

اولا مرحبا بيك
ثانيا انا شفت الصور ولاقيتها موجودة انتى قصدك مش واضحة ازاى يعنى مش باينة خالص ولا الطريقة مش واضحة على الصور

ثالثا
الملح والرز واللبن
بص بقى أولا الرز على حسب أحتياجات كل حد يعنى أكيد كلنا بنعمل رز وبنحط عليه ملح صح
هيا نفس الكمية بتاعت الرز لما تحطها حط عليها نفس كمية الملح واللبن ده برضة بيكون بالتقريب لان فيه ناس بتحبه كتير وناس بتحبه شوية صغيرة
وعلى العموم انا هعمل الرز ده تانى وهكتب المقادير بالظبط علشان الكل يقدر يعمله

أنا تحت أمركم وطلباتكم أوامر

بسمه عبدالباسط يقول...

alamcom

هبقى اجرب موضوع الشوربة ده
بس فيه ناس بتحط لبن وشوربة وانا جربتها


تحياتى لك

media يقول...

لذيذة اوي المدونه دي وتوجع

على فكرة انا لسه عامله رز معمر النهارده وكان لذيذ

همسات ساكنه يقول...

سهر الليالي
اكيد بنتشرف بانضمامك لينا
انا عملتلك دعوه وابقي ورينا همتك بقى في الاصناف
واكيد اي حد عايز ينضم معانا بنتشرف باي حد ينضم لينا بس لازم يشارك معانا اكيد بجد

بسمه عبدالباسط يقول...

لولا

تشرفنا بزيارتك وسعدنا بكلامك

ابقى زورينا دايما

Soooo يقول...

هييييييييييييييه
انا عملت رز معمر ياجدعان
وطلع طعمه حلو قوي
بجد تسلم ايديكم يارب


ملحوظه
الاقيش حداكم طريقة عمل عجينة البيتزا؟؟؟؟؟




سلاموووووووووووووز

العاب يقول...

يعطيك العافية